Kryeministri Rama fton drejtësinë: Tryezë për pagat

Kryeministri Edi Rama do të zhvillojë në 28 shtator një tryezë të përbashkët konsultimi me drejtuesit e institucioneve të drejtësisë në vend.

Tryeza do të mbahet ditën e hënë, më 28 shtator, në orën 12:30, në godinën e Kryeministrisë dhe në fokus të saj do të jetë ligji i ri i pagave për magjistratët.

Kryeministri fton drejtuesit e institucioneve të drejtësisë në vend në këtë tryezë të përbashkët konsultimi, si pikënisje e një procesi të hapur konsultimi, dialogu dhe bashkërendimi institucional mbi ndërtimin e një mekanizmi të qëndrueshëm, koherent dhe të parashikueshëm për përcaktimin e pagave në sistemin e drejtësisë, sipas standardeve evropiane.

Në letrën drejtuar përfaqësuesve të institucioneve të drejtësisë thuhet se diskutimi do të përqendrohet në identifikimin e parimeve, kritereve dhe instrumenteve që duhet të udhëheqin politikën e pagave, duke garantuar njëkohësisht qëndrueshmërinë buxhetore, koherencën ndërinstitucionale, proporcionalitetin ndërmjet funksioneve dhe përgjegjësive.

Nëpërmjet këtij procesi konsultimi synohet të arrihet një qasje e përbashkët institucionale për një mekanizëm pagash që kontribuon në konsolidimin e pavarësisë, integritetit dhe profesionalizmit të sistemit të drejtësisë, duke siguruar rregulla të qarta dhe objektive për përcaktimin e rritjes së pagave.