Ish-ambasadori Lisen Bashkurti, shprehet skeptik mbi mënyrën e kryesimit të OSBE-së nga ana e vendit tonë. Sipas tij, drejtuesit e Ministrisë së Jashtme nuk kanë kredencialet, eksperiencën dhe kulturën e duhur për të drejtuar një organizatë kaq të rëndësishme.
“Ministria e Jashtme është pa udhëheqje prej shumë kohësh. Ministri i Jashtëm është kryeministri formalisht, por ai nuk i dedikohet fare kësaj pune. Ndërsa drejtuesit e Ministrisë së Jashtme nuk kanë kredencialet, eksperiencën dhe kulturën e duhur. Në një situatë kaq të rëndësishme për Shqipërinë, kemi mangësi serioze në lidershipin diplomatik dhe jam i sigurt që kjo do të reflektohet edhe në drejtimin e OSBE-së”, tha Bashkurti për ”A2Cnn”.
Ish-ambasadori mendon se ky është moment shumë i rëndësishëm për vendin, pasi sipas tij, ka probleme në 3 fushat kryesore ku vë theksin OSBE-ja. Ish-ambasadori ka rezerva edhe për kryeministrin Edi Rama. “Kryeministri po tregon një sjellje shumë kontraverse politike dhe shumë amatore në marrëdhëniet ndërkombëtare. Ndryshe sillet me partinë e vet, ndryshe me institucionet, ndryshe me median dhe kjo do të jetë problematike”.
