Ksamil nën monitorim, verifikohen standardet e sezonit turistik

Agjencia Kombëtare e Bregdetit dhe bashkia Sarandë zhvilluan një inspektim të përbashkët në plazhet publike dhe private përgjatë vijës bregdetare të Ksamilit, në kuadër të monitorimit të sezonit turistik dhe garantimit të respektimit të hapësirave publike.

Ministri i Turizmit, Kulturës dhe Sportit, Blendi Gonxhja ndau në rrjetet sociale momente nga aksioni, duke theksuar rëndësinë e administrimit korrekt të hapësirave në plazh dhe zbatimit të standardeve për mbarëvajtjen e sezonit turistik. Administrimi i hapësirave në plazh dhe respektimi i standardeve është një hap i mirë drejt një sezoni turistik të sigurt, u shpreh Gonxhja.

Sipas tij, gjatë inspektimeve u verifikua zbatimi i detyrimeve ligjore nga subjektet që operojnë në vijën bregdetare, administrimi i hapësirave publike dhe private, si dhe respektimi i kushteve dhe standardeve të përcaktuara për ofrimin e shërbimeve ndaj pushuesve.

Ky proces monitorimi synon të garantojë një sezon turistik të rregullt, të sigurt dhe cilësor, në funksion të qytetarëve dhe vizitorëve vendas e të huaj që zgjedhin bregdetin shqiptar gjatë muajve të verës. Institucionet e linjës kanë nisur kontrollet dhe inspektimet në zonat bregdetare, me fokus respektimin e ligjit, mbrojtjen e hapësirave publike dhe përmirësimin e standardeve të shërbimit gjatë këtij sezoni turistik.