”Kujtoni fëmijët që kemi përcjellë jashtë”, Vatnikaj: Mafia është ende në pushtet, nuk duhet të kemi frikë

Në protestën e ditës së 103-të, bashkë-organizatorja Sidorela Vatnikaj bëri thirrje që shqiptarët të mos harrojnë vështirësitë dhe problematikat me të cilat përballen prej vitesh. Vatnikaj u shpreh se qytetarët duhet të kujtojnë realitetin e një vendi ku shumë familje detyrohen të largojnë fëmijët jashtë Shqipërisë, ndërsa akuzoi pushtetin se vijon të përçajë qytetarët. Ajo deklaroi gjithashtu se “mafia është ende në pushtet” dhe se duhet të ndërmerren hapa për çmontimin e saj.

“Pushteti kërkon që të na përçajë. Ne duam Shqipërinë e lirë dhe demokratike që kemi ëndërruar. Ne nuk e hamë më sapunin për djathë. Jemi këtu sepse jemi bërë bashkë dhe e njohim armikun që na ka dhunuar e na ka grabitur për 36 vjet”, deklaroi Vatnikaj. Gjatë fjalës së saj, ajo ngriti shqetësime edhe për gjendjen e sistemit shëndetësor dhe arsimit, duke përmendur mungesën e medikamenteve në spitale dhe problematikat në shkolla.

Vatnikaj iu referua edhe rastit të Martin Canit, duke kritikuar institucionet për atë që e cilësoi si mungesë reagimi institucional pas vrasjes së të miturit. Një tjetër shqetësim i ngritur prej saj ishte emigrimi i të rinjve dhe pasojat që ai sjell për familjet shqiptare. “Kujtoni fëmijët tanë që i kemi përcjellë jashtë vendit, kujtoni nipër e mbesa që nuk dinë as shqip, sepse prindërit e tyre kanë ikur nga ky vend”, tha ajo.

Në përfundim të deklaratës, protestuesja e cilësoi protestën si një moment që, sipas saj, mund të shërbejë si pikënisje për ndryshimin e vendit. Ajo u bëri thirrje qytetarëve të mos kenë frikë dhe theksoi se protestuesit kërkojnë një Shqipëri të lirë dhe demokratike. “Por ia kemi dalë për të thënë se këtu vendosim ne”, përfundoi Vatnikaj.