Kulluri: Wendt i mbylli gojën politikës shqiptare! Rama dhe Berisha mund të krijojnë destabilitet

Analisti Edvin Kulluri flet për qëndrimet që mbajti i propozuari nga presidenti Trump si ambasador në Tiranë të Amerikës. Eric Wendt gjatë daljes në Senatin amerikan, u ndal te reforma në drejtësi, SPAK dhe raportet mes politikës shqiptare dhe SHBA-ve. Sipas Kullurit, reforma në drejtësi nuk është produkt i qeverisë së Edi Rama, por një iniciativë e drejtpërdrejtë e SHBA-ve dhe BE-së.

Ai thotë se sheh një përplasje të hapur mes partive tradicionale dhe SPAK. ”PS, PD dhe Partinë e Lirisë i shoh në konflikt të hapur me SPAK. Ilir Meta merret me prokurorët e vet, Berisha me të vetët, Rama me ata që i godasin Veliajn dhe Ballukun, dhe të gjithë thonë që janë pro reformës dhe pro amerikanë. Janë qesharakë”, deklaroi Kulluri në ”News 24”.

Kulluri nënvizon se kandidati për ambasador ka përmendur qartë korrupsionin si një nga problemet kryesore në Shqipëri. ”Ambasadori i mundshëm Wendt ka përmendur fjalën korrupsion, jo vetëm krimin e organizuar. Ka përmendur korrupsionin si problem në Shqipëri. Përmendi edhe çështjen e portit të Porto Romanos, që është shumë sensitive”, tha ai.

Sipas Kullurit, deklarata e Wendt se SPAK është institucion apolitik ishte një mesazh i drejtpërdrejtë për politikën shqiptare. Në fund, ai paralajmëroi se përplasjet mes qeverisë shqiptare dhe SHBA-ve mund të thellohen nëse do të ketë akuza të reja ndaj zyrtarëve të lartë. ”Nëse do kemi sërish akuza për Ballukun dhe Rama do e mbrojë, për mua ajo që dallohet qartë është një krizë diplomatike e qeverisë me SHBA. Rama nuk ka asnjë takim zyrtar me DASH apo presidentin. Rama dhe Berisha do krijojnë, nëse munden, edhe destabilitet politik për të mbrojtur veten e tyre”.