Kush e kërcënon Limos Dizdarin?!

Artisti Limos Dizdari është kërcënuar me jetë.

Pak ditë më parë, ai i ka dërguar nje mesazh kryeministrit Rama, ku i bënte me dije shqetësimin e tij.

“I dashur Edi. Dua t’ju takoj. Më kanë kërcënuar dhe ndihem shumë i rrezikuar…”, i shkruante ai Ramës.

I pyetur nga Dita se kush e ka kërcënuar, Dizdari shprehet:

“Do t’i tregoj njëherë tjetër. Janë falanga të lidhura apo të komanduara nga njerëz shumë të pushtetshëm në Tiranë… Një herë tjetër do t’i tregoj…”.

“Natyrisht që e di… Por, për momentin nuk do të jap emra konkretë. Kam besim tek ato që i kam treguar Kryeministrit Rama dhe besoj shumë në vendosmërinë e tij për ta zgjidhur këtë problem…”, vijon më tej ai.

Avokati i tij, Altin Isufi, i ka bërë avokates së përgjithshme të shtetit, Alma Hicka, një ankesë.

Në ankesë tregohet me hollësi kërcënimi që i është bërë Limos Dizdarit. Bëhet fjalë për rrëmbimin apo zaptimin e një sipërfaqe prej 230 m2 truall që është brenda hapësirës së kompleksit “Dea’ që e disponon me dokumente të rregullta Limos Dizdari.

Avokati e mbyll ankimimin e tij me fjalët: “Vonesat në verifikimin dhe zgjidhjen e kësaj çështjeje rrezikojnë seriozisht interesat ekonomike të  Shoqërisë “Dea’ Sh.p.k., e cila ka rritur dhe vazhdon të rrisë vlerat e objektit, duke e vënë atë në shërbim të komunitetit”.

Mesazhi i Limosit i ishte dërguar kryeministrit të enjten e kaluar, ditën kur mbahet seanca plenare javore e parlamentit dhe kur ish-kryeministri Berisha bëri atë thirrjen famëkeqe për armatosjen e popullsisë.

Rama e kishte telefonuar menjëherë Limosin.

Por për shkak të seancës së Kuvendit, i kishte deleguar ndjekjen e kësaj çështjeje sekretarit të Përgjithshëm të kryeministrisë, zotit Agaçi.

Dhe ai e kishte pritur menjëherë Limosin, ishte njohur hollësisht me shqetësimin e tij dhe artisti kishte marrë garanci se kjo çështje është në duart e qeverisë tashmë.