Parlamenti është përfshirë këtë mbrëmje në përplasje, ku nënkryetari i PD dhe deputeti i Luçiano Boçi, është përjashtuar nga Niko Peleshi, sepse deputeti Boçi, sipas kryeparlamentarit, ka bllokuar foltoren e Kuvendit.
Nënkryetari dhe deputeti i PD, Luçiano Boçi ka kritikuar në Kuvend projektligjin “Për krijimin e Agjencisë Kombëtare të Shërbimeve Arsimore”, duke e cilësuar atë si një nismë që, sipas tij, “vjen era klientelizëm”. Boçi u shpreh se projektligji ka një “fabul të thjeshtë”, që sipas tij lidhet me mënyrën e hartimit të nismës dhe përfshirjen e aktorëve joqeveritarë në proces.
“Një ministre ndryshon portofolin ministror. Merr një ministri tjetër dhe papritur në ministrinë e re gjen një fondacion me të cilin ka bashkëpunuar vite të tëra dhe me ekspertët e këtij fondacioni fillon ekspertiza e Qendrës Shqiptare Arsimore, duke dalë në konkluzionin që QSHA duhet të shndërrohet në agjenci”, deklaroi Boçi.
Ai shtoi se krijimi i agjencisë së re ngre shqetësime për mënyrën e vendimmarrjes në sistemin arsimor. “Pra i bie që shteti shqiptar në arsimin e tij kombëtar ruan karriget dhe çelësin e vendimmarrjes e ka ky fondacion”, u shpreh deputeti demokrat.
Boçi theksoi gjithashtu se projektligji është shoqëruar me mungesë të konsultimit publik dhe përfshirje të pamjaftueshme të aktorëve të arsimit të lartë. “Universitetet nuk kanë qenë në dijeni për ardhjen e këtij projektligji në komisionet e Kuvendit”, deklaroi ai.
Me pas deputeti Boçi insistoi se nuk është korrekte kjo që po bën mazhoranca dhe doli në foltore. Por ndërhyri Garda duke e bllokuar deputetin demokrat të futej në seancë. Me pas doli shefi i grupit parlamentar demokrat, Belind Këlliçi, që i kërkoi Niko Peleshit që të tërhiqte masën disiplinore ndaj Luçiano Boçi. Por kryeparlamentari nuk pranoi ndaj grupi demokrat braktisi seancën në shenjë solidariteti me deputetin Boçin.
“Ne do të braktisim sallën në shenjë solidariteti. Le të vazhdojnë kolegët e PL. Ajo që keni bërë është e patolerueshme nga ana jonë! Kjo mund të ndodhë vetëm në këtë sallë Kuvendi! Nëse nuk gjeni mënyrë për të rikthyer normalitetin, ne do të largohemi në shenjë solidariteti me nënkryetarin e PD”, tha Këlliçi.
“Unë ju them mos u solidarizoni me një shkelje rregulloreje, është vendimi juaj nëse do të vazhdoni apo jo”, ia ktheu Peleshi.
