Përplasja për pagat e magjistratëve rikthehet në Gjykatën Kushtetuese. Shoqata Kombëtare e Gjyqtarëve, Unioni i Gjyqtarëve dhe Shoqata e Prokurorëve kanë kërkuar pezullimin e menjëhershëm të ligjit të ri dhe më pas shfuqizimin e tij.
Kuvendi miratoi formulën sipas së cilës paga e magjistratëve do të jetë 38% e pagës së Presidentit, nga 36% më parë. Tre shoqatat kundërshtojnë zbatimin e menjëhershëm të ligjit dhe efektet financiare nga 1 prilli 2023.
Sipas tyre, rillogaritja e pagave për më shumë se tre vite do të krijonte pasoja financiare dhe administrative të vështira për t’u korrigjuar.
“Ligji nr. 95/2026 ka hyrë në fuqi menjëherë, duke shmangur edhe periudhën e zakonshme ndërmjet botimit dhe fillimit të efekteve të tij. Për më tepër, neni 3 i tij i shtrin efektet financiare që nga data 01.04.2023 për pagat e gjyqtarëve, prokurorëve dhe anëtarëve e kryetarit të Gjykatës Kushtetuese. Bashkimi i hyrjes së menjëhershme në fuqi me veprimin prapaveprues e bën rrezikun jo vetëm të afërt, por aktual. Strukturat financiare të gjykatave dhe prokurorive detyrohen të fillojnë menjëherë rillogaritjen e pagave për një periudhë mbi trevjeçare, të ndryshojnë listëpagesat dhe të rivlerësojnë shumat tashmë të njohura ose të paguara”, thuhet në ankim.
