Nga Albert Vataj
Askush nuk do ta besonte se një ditë do të mund të shihte nën llamburitjet verbuese të pasarelave të modës së shekullit XXI, një aksesor elegant dhe shumë i hirshëm, që vjen nga mesjeta, nga njëri prej kolosëve të Rilindjes së Artë, nga i madhi Leonardo da Vinçi.
E quajmë mitin i themelit të artit dhe të crossover-it në modë, në qoftë se ju pëlqen: në librin e saj të ri, “Jeta dhe sekretet e veshjeve”, akademikja, Shahida Bari, tregon se Leonardo da Vinci nuk ishte vetëm një piktor, skulptor, shkencëtar vizionar, dijetar, arkitekt, muzikant, matematicien, inxhinier, shpikës, anatomist, gjeolog, hartograf, botanist dhe shkrimtar, por edhe një pionier në fushën e dizajnit të aksesorëve.
Shahida Bari veçon një imazh nga “Codex Atlanticus” i Leonardos, që përshkruan në një prej vizatimeve të tij një qese lëkure. “Qesja, në shumë mënyra, është e ngjashme me një kuletë të shekullit të XX”, tregon ajo për CNN .
“Ka fiksuese prej bronzi në majë, është bërë prej lëkure kafshe ngjyrë kafe, dhe ka një kapëse të madhe. Është si një kuletë klasike që mund të kishte mami im”, thotë akademikja. Në të vërtetë, vizioni i Leonardos ka qenë aq i qëndrueshëm saqë në vitin 2012 marka italiane Gherardini shkoi aq larg sa të prodhonte një çantë duke i’u referuar dizajnit të mjeshtrit të madh të Rilindjes së Artë.
Sigurisht, shumë artistë bashkëkohorë kanë ndjekur hapat e Leonardos, ashtu siç bënë edhe studjues dhe personalitete krijuese të fushave të tjera, ku Leonardo dha ide novatore dhe ngjizi alfabetin e komunikimit shkencor, artistik dhe estetik. Në vitin 2017, Jeff Koons bashkëpunoi me Louis Vuitton për prodhimin e një serie çantash të frymëzuara nga stilet e artit historik (duke përfshirë edhe vetë Mona Lizëna të Leonardos). Për të vijuar më tej, në 2013, Damien Hirst u bashkua me Prada për të prodhuar çanta të vogla Plexiglas, dekoruar me dizajne të insekteve.
Artisti i radhës që hyri në këtë ngasje është Sterling Ruby, i cili kohët e fundit zbuloi linjën e tij të re të modës në Firence – duke përfshirë pajisje të tilla si ‘një kuletë drejtkëndëshe të prodhuar tërësisht nga metalet e argjendta”. Ja se çfarë bën një artist i madh si Leonardo, josh gjigandët e modës dhe fashionit, duke bëra që të ridimensionojnë figurën e këtij mjeshtri të madh.
Albert Vataj