Investitorët shqiptarë, bankat dhe fondet e investimit kanë shfaqur një interes të madh në letrat me vlerë, që në këtë periudhë krize ofrojnë norma më të larta kthimi të investimit, sesa alternativat e tjera që gjenden në treg.
Banka e Shqipërisë zhvilloi këtë javë ankandin për obligacionin 10-vjeçar të qeverisë, për një shumë prej 3,5 miliardë lekësh. Për shumën e shpallur, u ofruan kërkesa me vlerë 6,5 miliardë lekë, duke mundësuar një normë interesi prej 5,38% në vit për këtë instrument afatgjatë. Kërkesa e lartë lidhet edhe me faktin se qeveria vendosi të shfrytëzonte eurobondin për të financuar nevojat e saj gjatë gjysmës së dytë të 2020-s, duke krijuar mjaft likuiditet në tregun vendas.
Ministria e Financave planifikon të kërkojë 96,7 miliardë lekë, apo rreth 784 milionë euro nga tregu i brendshëm. Krahas bonove dhe instrumentave të tjerë më afatshkurtër, priten edhe dy emetime për obligacione afatgjatë 3 dhe 5 dhe 7-vjeçare, që sërish premtojnë një normë interesi favorizuese për investitorët.
