Lezhë/ Flakët pushtojnë varrezat, në rrezik Kisha dhe zonat e banuara në Rras e Zimaj

Pamje dramatike vijnë nga fshati Rras i Lezhës, ku flakët kanë përfshirë edhe varrezat. Zjarri po rrezikon një kishë, por edhe zonat e banuara në fshatrat Ungrej, Rras dhe Zimaj. Forcat zjarrfikëse ndodhen në terren, së bashku me banorët e zonës, në përpjekje për të vënë nën kontroll flakët. Ndërhyrja nga toka vijon të jetë e vështirë për shkak të terrenit të thyer malor.

Situata është kritike edhe në Pukë, ku mali i Tërbunit, një nga pasuritë më të mëdha pyjore të zonës, po përfshihet sërish nga flakët. Zjarret e riaktivizuara po shkrumbojnë edhe sipërfaqet që kishin mbetur pa u prekur nga vatrat e fundgushtit. Vija e zjarrit tashmë i kalon 10 kilometra dhe flakët i janë afruar lagjes Pezhve, ku një banesë është djegur plotësisht. Ndërhyrja nga ajri në malin e Tërbunit ka qenë e pamundur, pasi helikopterët ndodhen të angazhuar në operacionet për shuarjen e zjarreve në Shkodër.

Sakaq, në fshatin Bardhaj të Shkodrës, ku zjarri vijon prej tre ditësh, forcat e ushtrisë dhe shërbimet zjarrfikëse kanë krijuar një perimetër sigurie për mbrojtjen e zonave të banuara. Banorët kërkojnë zbardhjen e plotë të shkaqeve dhe identifikimin e personave përgjegjës për zjarrvënien.

Në të gjithë vendin raportohen 14 vatra aktive zjarri, mes tyre në Malin e Dajtit, Vajkal të Bulqizës dhe Kryeziun në Kavajë. Policia ka intensifikuar kontrollet dhe hetimet për identifikimin e autorëve të zjarrvënieve. Në Fier janë arrestuar dy persona, të dyshuar për zjarrvënie të qëllimshme. Një 25-vjeçar u kap me dron në një zonë të mbrojtur në fshatin Hasturkas, ndërsa një 60-vjeçar në Eskaj dyshohet se i ka vënë zjarrin tokës që kishte marrë me qira. Për dy persona të tjerë, të moshuar, hetimet po vijojnë në gjendje të lirë.

Për situatën e zjarreve ka reaguar edhe ministri i Brendshëm, Besfort Lamallari. Ai deklaroi se këto raste nuk mund të konsiderohen thjesht si pasojë e pakujdesisë dhe se policia do të vijojë monitorimin e rreptë të territorit, me qëllim identifikimin dhe ndëshkimin e çdo personi përgjegjës.

Lexoni edhe:

VIDEO/ Gjekmarkaj për zjarrin në Ungrej: Rreziku ka mbërritur pranë shtëpive, kërkohet ndërhyrje urgjente

Zjarret përvëlojnë Shqipërinë, Balla: Drejtësia dorëzohet përballë piromanëve: 211 raste në 5 vite, vetëm 18 fajtorë

14 vatra aktive, Çako: Mali i Tërbunit ka flakë të konsiderueshme