Lezhë, Kryemadhi: Denoncim në Prokurori për gjetjen e 40 fletëve të votimit

Deputetja e Lëvizjes Socialiste për Integrim, Monika Kryemadhi, informoi sot se do të bëjë një denoncim në Prokurori lidhur me gjetjen e 40 fletëve më tepër mbi numrin e zgjedhësve, në kutinë e votimit 720 të komunës Kolsh, në Lezhë.

Në një prononcim për media, Kryemadhi theksoi se “në kutinë 720 të Komunës Kolsh janë gjetur 40 fletë votimi mbi numrin e njerëzve që kanë marrë pjesë në votime. Sigurisht që kjo është një gjë shumë e rëndë që ka ndodhur, është një cenim i procesit zgjedhor. Është një deformim i votës së qytetarëve. Ne do të bëjmë denoncim në Prokurori për 7 komisionerët qofshin ata të PS-së, LSI-së dhe PD-së, si dhe ftoj edhe kolegët e PD-së të bëjnë të njëjtën gjë sepse mendoj t’i japim fund procesit të deformimit të votës që i bëhet qytetarit”.

“Nuk kam dyshimin më të vogël se do t’i shkojmë deri në fund. I bëj thirrje të gjithë numëruesve tanë, vëzhguesve që të jenë të vëmendshëm për mosblllokimin e procesit të numërimit, por edhe të regjistrimit të çdo parregullsie, sepse për mua është e rëndë që në një kuti votimit të gjenden 40 fletë votimi mbi numrin e zgjedhësve, pasi mbi 40 fletë votimi nuk është gabim njerëzor”, nënvizoi Kryemadhi.

Deri tani në Lezhë janë numëruar 24 nga 30 kuti votimit, ku kandidati për kryetar bashkie Viktor Tushaj i ASHE-së, ka marrë 7.965 vota, pra 50,83%, ndërsa kandidati Fran Frrokaj i APPD ka marrë 7.704 vota, pra 49,17%.