Një aksident është regjistruar në fshatin Farret, në njësinë administrative Stravaj të Librazhdit, ku një automjet tip “Benz” ka dalë nga rruga dhe ka përfunduar në një greminë rreth 150 metra larg saj.
Në drejtimin e automjetit ndodhej 22-vjeçari Renis Pajtim Kalnxhi, i lindur në vitin 2004, i cili ka mbetur i plagosur dhe është transportuar në Spitalin e Librazhdit për të marrë ndihmën mjekësore. Sipas informacioneve paraprake, ai ndodhet jashtë rrezikut për jetën.
Nga verifikimet në vendngjarje nuk rezulton të ketë pasur persona të tjerë në automjet. Gjatë kontrollit të zonës, pranë makinës së shkatërruar, policia ka gjetur edhe një armë zjarri tip pistoletë, e cila është sekuestruar në cilësinë e provës materiale.
Ndërkohë, burime bëjnë me dije se 22-vjeçari dyshohet të jetë përfshirë në një konflikt përpara aksidentit, ku mund të ketë pësuar dëmtime para se automjeti të dilte nga rruga.
Policia e Librazhdit po vijon hetimet për të zbardhur rrethanat e plota të ngjarjes, si dhe për të përcaktuar nëse konflikti i dyshuar ka lidhje me aksidentin.