Ligji i ri i Policisë hyn në fuqi/ Drejtorët pa garë, kryepolici qëndron në detyrë edhe pas mandatit

Policia e Shtetit hyn në një fazë të re me rregullat e ndryshuara për drejtimin e strukturave në terren. Nga sot, 24 gusht, drejtori i Përgjithshëm i Policisë së Shtetit ka më shumë hapësirë për të ndërhyrë në drejtimin e drejtorive vendore dhe komisariateve, kur e vlerëson të nevojshme për përmirësimin e rendit dhe sigurisë publike.

Ndryshimi vjen pas dy vitesh nga hyrja në fuqi e një sistemi që e lidhte përzgjedhjen e drejtuesve të niveleve të ndryshme me procedurat e konkurrimit. Ky mekanizëm, i cili synonte të rriste garën dhe meritokracinë brenda Policisë së Shtetit, tashmë është rishikuar nga ligjvënësi. Ndryshimet e reja u miratuan nga mazhoranca në seancën parlamentare të 23 korrikut dhe hyjnë zyrtarisht në fuqi këtë të hënë. Me ligjin e ri, drejtuesi i Policisë së Shtetit fiton sërish mundësi më të gjera për të bërë ndryshime në strukturat vendore, në varësi të nevojave që evidentohen në terren.

Konkursi mbetet për postet kryesore. Përzgjedhja e drejtorit të Përgjithshëm do të vijojë të bëhet përmes konkurrimit, ndërsa e njëjta praktikë ruhet edhe për drejtuesit e departamenteve. Ky element ishte një nga pikat e diskutueshme të draftit fillestar, ku ishte parashikuar heqja e konkursit për këtë kategori. Një tjetër risi lidhet me statusin e drejtuesit të Përgjithshëm pas përfundimit të mandatit. Sipas rregullimeve të reja, ai nuk largohet përfundimisht nga strukturat e Policisë së Shtetit, por mund të vijojë karrierën brenda saj. Në këtë kuadër, Skënder Hita pritet të jetë rasti i parë i një drejtori të Përgjithshëm me gradën “drejtues madhor” që, pas përfundimit të mandatit, do të rikthehet në radhët e Policisë.

Ndryshime ka edhe në sistemin e gradave. Koha e nevojshme për kalimin nga grada “komisar” në “kryekomisar” dhe më pas në “drejtues” reduktohet nga pesë në katër vite. Argumenti i ndryshimit është që efektivët që tregojnë rezultate të mira të mos pengohen nga pritja e gjatë për shkak të procedurave formale. Ligji i ri parashikon gjithashtu mundësinë e avancimit në gradë si shpërblim për veprime të veçanta.

Një punonjës policie mund të ngrihet në gradë kur, në një situatë të rrezikshme apo të paparashikueshme, kryen një veprim që tejkalon pritshmëritë dhe demonstron aftësi të veçanta profesionale. Me këto ndryshime, Policia e Shtetit rikthen një pjesë të kompetencave të drejtpërdrejta të drejtimit në terren, ndërsa ruan konkurrimin për postet më të larta drejtuese. Synimi i deklaruar është rritja e fleksibilitetit dhe reagimit të strukturave policore ndaj situatave konkrete të rendit dhe sigurisë publike.