Lirohen 6 protestuesit, Arben Kola zbardh skenarin e vijimit të protestës

Pas incidenteve që shoqëruan protestën para Kuvendit, ku disa protestues u shoqëruan nga Policia e Tiranës pas hedhjes së vezëve në drejtim të automjeteve të deputetëve dhe u mbajtën për disa orë në Komisariatin Nr. 1, organizatorët kanë konfirmuar vijimin e protestave.

Personat e ndaluar janë liruar pas disa orësh, ndërsa protesta e radhës do të zhvillohet sipas planit të parashikuar. Grumbullimi i protestuesve do të nisë në orën 19:00 në Sheshin “Skënderbej”, për t’u pasuar nga një marshim drejt godinës së Kryeministrisë. Njëri prej koordinuesve të protestës, Arben Kola bëri të ditur itinerarin e tubimit, duke deklaruar se marshimi do të nisë nga sheshi “Skënderbej” dhe do të vijojë drejt Kryeministrisë.

Dritan Goxhaj tha pas lirimit se policia i ka komunikuar se është arrestuar me akuzën për mosbindje ndaj urdhrit të punonjësve të policisë. ”Arsyeja e shoqërimit ishte pretendimi për kundërshtim të punonjësve të policisë, edhe pse ne nuk i kemi kundërshtuar. Ne kemi qenë gardh dhe u kemi bërë thirrje protestuesve të mos prekin punonjësit e policisë”.-tha Goxhaj.

Kurse Shkëlzen Bushi deklaroi se u kërkoi efektivëve të shkonte vetë në polici, por u shoqërua forcërisht. ”Kam qenë duke ndarë protestuesit nga policia, por këta na tërhoqën zvarrë. Thashë vij vetë, nuk ka nevojë të më shtrëngoni prangat. 10% e policisë dhe 140 deputetët janë kriminelë”, tha ai.