Një hapësirë publike e zënë në mënyrë të kundërligjshme dhe e kthyer në vendparkim makinash në zonën e Astirit është liruar nga Policia e Tiranës.
Policia njoftoi sot se “si rezultat i patrullimeve dhe i verifikimeve të kryera sistematikisht dhe në bazë të informacioneve të siguruara në rrugë operative, shërbimet e Komisariatit të Policisë Nr. 6, në bashkëpunim me shërbimet e Policisë Bashkiake dhe ato të IMT-së, konstatuan se një hapësirë publike, në rrugën “Teodor Keko”, ishte zënë në kundërshtim me ligjin dhe ishte kthyer në vendparkim automjetesh”.
Në përfundim të veprimeve hetimore për rastin, Policia bëri me dije se “nisi procedimi në gjendje të lirë për autorin e dyshuar të kësaj paligjshmërie, shtetasin F. M., 54 vjeç, për veprën penale “Pushtimi i tokës””.
Policia e Tiranës vijon kontrollet në terren dhe thekson se nuk do të tolerohet asnjë rast i cenimit të hapësirave publike.