Lumenjtë nën pushtetin e mbetjeve dhe plehrave

Ndotja e mjedisit është një nga problemet madhore por që “vret” ngadalë në vendin tonë dhe si duket asnjë instancë e pushteti nuk e merr aq seriozisht sa të ndërhyjë menjëherë.

Menaxhimi i mbetjeve urbane vijon të jetë problematik, pasi në gjithë territorin e vendit ka vatra mbetjesh që nuk duhet të ishin aty.

Kryetarja e bashkisë Ura Vajgurore, Juliana Memaj është shprehur për Top Channel:

Edhe pse Bashkia Ura Vajgurore sot nuk i derdh mbetjet e saj përgjatë lumit Osum, bashki të tjera kufitare e bëjnë këtë. Pra, që të kemi një përmirësim efektiv të të gjitha mbetjeve duhet një koordinim i të gjitha bashkive që shtrihen në qarkun tonë.”

Ndërsa kryetari i bashkisë Mallakastër, Sgron Kapllanaj thotë po për TCH:

Mallakastra ka një vendgrumbullimi por duhet thënë se ajo është një pikë që nuk i plotëson të gjitha standardet , nuk është një landfill.”

199 venddepozitime gjenden në territorin e Shqipërisë sipas raportit për kostot e tarifat e mbetjeve urbane, nga të cilat 62 prej tyre duhet të mbyllen menjëherë. Venddepozitimet e tjera duhet të transportohen pranë incineratorëve apo në landfille si dhe një opsion tjetër është rehabilitimi i tyre.

Zv.ministrja e turizmit, Ornela Çuçi thotë:

Janë 35 vend-depozitime afër zonave të mbrojtura dhe 130 venddepozitime ndodhen afër lumenjve.”

Ndërkohë që Ministria e Turizmit së bashku me 61 bashkitë kanë realizuar një plan të përbashkët ndërhyrjeje në lidhje me menaxhimin e këtyre mbetjeve.

Ministri Klosi shprehet:

Mes qytetit kemi venddepozitime, se aty kanë qenë e si prishim dot… por nuk e pranojmë dot, është viti 2018 dhe ndaj duam të bëjmë një plan të përbashkët me 61 bashkitë. Për bashkinë e Beratit kemi kaq venddepozitime ilegale, kush do jetë në periudhë tranzitore e kush do mbyllet, për bashkinë e Tropojës kush do jetë I përkohshëm e kush do mbyllet, për bashkinë e Kamzës e kështu me radhë. Që ne bashkitë të biem në dakordësi që për buxhetin e vitit të ardhshëm ne të ndërhyjmë aty ku bashkitë nuk kanë mundësi.”

Qarku i Korçës, Beratit dhe Durrësit shfaqen venddepozitimet që duhen mbyllur sa më parë, pasi në hartë janë evidentuar me pika të kuqe. Ndërkohë qe 31 dhjetori është afati i fundit i bashkive për të dorëzuar planet e përmirësuara të mbetjeve.