Janë publikuar pamjet e aksidentit tragjik të ndodhur në orët e para të së mërkurës në Durrës, ku humbën jetën tre persona dhe dy të tjerë mbetën të plagosur. Automjeti shihet duke lëvizur me shpejtësi të lartë, përpara se drejtuesi të humbiste kontrollin në një kthesë. Sipas ekspertizës, në momentin e përplasjes makina udhëtonte me rreth 114 km/orë.
Nga rindërtimi i ngjarjes rezulton se njëra prej gomave të automjetit ka goditur platformën prej betoni ku ishte vendosur një tabelë. Pas përplasjes, drejtuesi ka humbur kontrollin e mjetit, i cili ka dalë nga rruga dhe ka përfunduar në kanal. Për pasojë, tre personat që ndodheshin në automjet humbën jetën, ndërsa dy të tjerë u plagosën dhe u dërguan në spital për të marrë ndihmë mjekësore.
Ekspertiza ka evidentuar gjithashtu se drejtuesi i automjetit ishte nën efektin e alkoolit në momentin e aksidentit. Shpejtësia e lartë dhe gjendja e drejtuesit dyshohet se kanë qenë ndër faktorët kryesorë që çuan në tragjedinë e rëndë. Viktimat e aksidentit janë identifikuar si Kleo Vrioni, 26-vjeçarja Sara Brugentelli dhe një 15-vjeçar.
