Manastirliu: Materniteti i Lezhës, realitet i një nevoje të kthyer në ëndrrën shumëvjeçare të komunitetit

”Materniteti i ri i Lezhës nga errësira u kthye në dritë, pas ndërrimit të godinës së re me infrastrukturë me standarde europiane”. Kështu shprehet ministrja e Shëndetësisë dhe Mbrojtjes Sociale, Ogerta Manastirliu e cila publikoi pamje nga ky maternitet, që do të ndryshojë cilësinë e shërbimit për të gjithë gratë që do lindin në Lezhë, por edhe për mjekët e infermierët që do të ofrojnë shërbime cilësore.

”Nga errësira në dritë. U bë realitet një nevojë e kthyer në ëndrrën shumëvjeçare të komunitetit. Shihni si ishte dhe si është sot materniteti i ri i Lezhës”,-shprehet Manastirliu. Infermieret e këtij spitali shprehen se “ndërtimi i këtij spitali është një arritje shumë e madhe. Nuk kemi fjalë, shumë faleminderit”.

Materniteti i ri është një investim i qeverisë shqiptare në vlerën 2.9 milionë euro dhe do të ketë 55 shtretër, 2 salla operacioni, 2 salla lindjesh. Materniteti i Lezhës u shërben edhe banorëve të zonave përreth dhe pas këtij investimi do të bëhet referencë në veri për këtë shërbim.