Mark Frroku del sot në Kuvend, policia e shoqëron në pritje të vendimit

Kuvendi i Shqipërisë  pritet të miratojë sot kërkesën e Prokurorisë së Përgjithshme për arrestimin e deputetit Mark Frroku. Ashtu si në seancën e një jave më parë, Kuvendi ka përcaktuar që si çështje të parë në diskutim për rendin e ditës së sotme të jetë kërkesë e Prokurorit të Përgjithshëm për dhënien e autorizimit për arrestimin ose heqjen e lirisë së deputetit të Kuvendit të Shqipërisë, Mark Frroku.  Pas paraqitjes së dy raporteve që kanë ardhur në seancë nga Këshilli i Rregullores, Mandateve dhe Imunitetit, është parashikuar që edhe vetë deputeti Mark Frroku të bëj mbrojtjen e tij përpara kolegëve, për të kërkuar rrëzimin e kërkesës së dërguar nga Prokuroria për arrestimin e tij.

Aktualisht me vendim të Gjykatës së Lartë deputeti Mark Frroku është nën masën e sigurisë “arrest shtëpie”. Hetimet për çështjen “Doshi” vijojnë, por nisja e hetimeve për një tjetër çështje që lidhet me një vrasje të kryer në Belgjikë në vitin 1999, për të cilën autoritetet belge e konsiderojnë bashkëpunëtor edhe deputetin Mark Frroku, ka detyruar avokatët e tij të kërkojnë leje nga Prokuroria për pjesëmarrjen e tij në seancë.

Avokatët e  deputetit Frroku, Sajmir Visha dhe Genc Gjokutaj kanë paraqitur në prokurori një kërkesë për pjesëmarrjen e klientit të tyre sot në seancën plenare. Pas autorizimit të dhënë nga organi i akuzës, Frroku do të jetë sot në seancë plenare për mbrojtjen e tij përpara kolegëve, të cilët një javë më parë mbi çështjen Doshi, votuan për arrestimin e tij. Njësoj si në seancën e zhvilluar në Këshillin e Mandateve, Frroku do të jetë i shoqëruar nga forcat e policisë, deri në brendësi të ambjenteve të Kuvendit.

Deputeti Mark Frroku pritet të mbajë të njëjtin qëndrim në seancë në lidhje me ngjarjen për të cilën akuzohet, duke mohuar autorësinë e veprës penale. Nëse Kuvendi do të votojë për autorizimin e Prokurorisë, Frroku do të duhet të rikthehet sërish në qeli pasi do të përballet edhe me akuzën për vrasje të ardhur nëpërmjet Interpolit nga shteti belg.