Mazniku inspektime në Librazhd: Rrugën që dikur komunës i duheshin 10 vite ta bënte, sot përfundoi me një investim të vetëm

Arbjan Mazniku, drejtuesi politik i qarkut Elbasan, njëherësh dhe bashkëkryetar i Reformës Territoriale ka zhvilluar sot një tur inspektimesh në Bashkinë Librazhd, ku ka theksuar ndryshimin e prekshëm mes asaj që dikur mund të bënin komunat dhe investimeve që realizohen sot nga bashkitë, pas reformës së viti 2014. Rruga e sapo përfundnuar Lunik–Prevallë është një shembull konkret i këtij transformimi.

Gjatë inspektimit, Mazniku u ndal te ndikimi që ka pasur reforma territoriale e vitit 2014 dhe mundësitë që ka hapur ajo për zhvillimin ekonomik dhe turistik të zonës. Rruga e përfunduar lidh katër fshatra dhe u shërben rreth 2,600 banorëve, duke përmirësuar ndjeshëm aksesin. Me një gjatësi prej 2.4 kilometrash, ajo është ndërtuar me standarde bashkëkohore, duke dhënë mundësi zonës për zhvillimin ekonomik dhe turistik.

”Është një zonë me potencial të jashtëzakonshëm për banorët, për të zhvilluar turizmin malor dhe për ata që duan të kthehen e të investojnë. Kemi një shembull të qartë se si përmirësohen shërbimet kur strukturat agregohen. Kur Luniku ishte komunë para 10 vitesh, buxheti total i komunës ishte rreth 15 milionë lekë, nga të cilat vetëm 5 milionë shkonin për investime. Ndërsa sot, vetëm kjo rrugë kap vlerën e 53 milionë lekëve, një investim që atëherë do të kërkonte mbi 10-11 vjet për t’u realizuar”.