Mbledhja e fundit e deputetëve në Kuvend, seanca nis me tensione

Seanca e fundit e legjislaturës së 10-të ka nisur me debate për zjarrin në landfillin e mbetjeve në Elbasan. Opozita kërkoi debat për këtë çështje, duke thënë se është një katastrofë mjedisore. Deputetja demokrate Tabaku tha se Kuvendi duhet të mbajë përgjegjësi për tre kontratat korruptive të inceneratorëve. Nga ana tjetër, kryetarja e Kuvendit, Elisa Spiropali, tha se kërkesën për debat deputetët duhet ta bëjnë sipas rregullores dhe mos ta përdorin çështjen për propagandën e ditës.

Gjithashtu, deputetja demokrate, Zheni Gjergji, mori fjalën për të folur për zjarrin në fushën e mbetjeve në Elbasan, por nuk kryetarja e Kuvendit nuk e lejoi me argumentin se nuk ishte çështje për procedurë. Deputetja demokrati mbajti për pak minuta të bllokuar foltoren dhe u përfshi në debate me Spiropalin.

Pjesë nga debati: 

Gjergji: Zjarri në Elbasan është një alarm i fortë për gjendjen dramatike të mjedisit dhe pasojë ë dështimit të projektit të inceneratorit.

Spiropali: Mos abuzo me procedurën…

Jorida Tabaku: Kam drejtuar dhe një komision hetimor, në emër të grupit të PD kemi kërkesë për një debat parlamentar për atë që ndodhi në Elbasan. E kemi nisur këtë diskutim në 2017, sot ndodhemi para faktit që asnjë nga inceneratorët nuk punon. Ministri i Financave duhet të japë llogari për pagesat e inceneratorëve. Skandal mjedisor që agravohet, nëse nuk diskutojmë për këtë, për çfarë do diskutojmë?

Elisa Spiropali: Bëni kërkesë sipas rregullores dhe jo duke u ngritur sot për propagandën e ditës.