Mblidhet Këshilli i Mandateve për deputetin socialist Kokëdhima
Këshilli për Rregulloren, Mandatet dhe Imunitetin ka nisur shqyrtimin e kërkesës së Grupit Parlamentar të Partisë Demokratike në lidhje me ndjekjen e procedurës parlamentare për konstatimin e pavlefshmërisë dhe mbarimit të mandatit të deputetit Koço Kokëdhima.
Në mbledhjen e parë Këshilli i Mandateve dhe Rregullores shtyu vendimin në lidhje me kërkesën e opozitës për heqjen e mandatit deputetit Koço Kokëdhima.
Maxhoranca kërkoi më shumë kohë për tu njohur me akuzat e paraqitura nga opozita. Deputeti demokrat Arben Ristani në përfundim të mbledhjes argumentoi se zvarritja e vendimit është një trajtim me dy standarte.
Ndërkaq Avokati i Kokëdhimës Artan Hajdari hodhi poshtë akuzat e PD duke deklaruar se deputeti socialist nuk është përfituar asnjë lek nga buxheti i shtetit në momentin që është shpallur deputet. Vetë deputeti Kokëdhima nuk ishte I pranishëm në mbledhjen që u zhvillua më 6 Prill.
