Mbyllen fjalimet, nis marshimi i qytetarëve: Rama jepe dorëheqjen

Pas fjalimeve që u mbajtën përballë Kryeministrisë, qytetarët kanë nisur marshimin siç është bërë çdo natë. Një prej 3 nismëtarëve të vetëshpallur ka treguar itinerarin që do të ndjekin protestuesit, i cili do të nisë nga Presidenca në zonën e ish-Bllokut, më pas në bulevardin Bajram Curri, te Xhamia e Namazgjasë te Parlamenti, më pas në Unazën e Vogël, drejt Kishës Ortodokse.

Më pas protestuesit do të rikthehen sërish në Bulevardin Dëshmorët e Kombit, para godinës së Kryeministrisë. Do të dalin sërish pas godinës së Kryeministrisë, pastaj do të marrin drejtimin për nga Parlamenti dhe do e mbyllin tubimin te Sheshi Skënderbej.

Pas bllokimit të Rinasit një ditë më parë, tre persona janë deklaruar si nismëtarë të protestës, të njohur edhe nga policia. Ata janë Luçiana Kokaj nga Rrjolli, Arben Kola nga Kukësi dhe Arlinda Lleshi nga Lezha.

Për të shmangur ngjarjen e mbrëmjes së shkuar, është vendosur që ata të udhëheqin edhe marshimet duke përdorur si pikë referimi një pankartë për studentët. Sipas tyre nuk kanë asnjë qëllim për të bllokuar rrugën drejt aeroportit. Ata deklarojnë se nuk duhet të kalojnë Unazën e Madhe. Kola pranoi se bllokimi i autostradës për në aeroportin e Rinasit ishte gabim dhe se nuk do të përsëritet më.