Me tentativën e vetëvrasjes, Bledari kërkoi arratisjen nga burgu

Bledar Selmanaj inskenoi një akt vetëvrasje, për të dalë nga burgu i Peqinit, aty ku vuan dënimin për vrasjen e një 25-vjeçari.

Si mjet për t’i shpëtuar prangave, ai ka prerë 4 hekura dhe ka tentuar që të dalë nga burgu, por është kapur në kohë nga ana e efektivëve të burgut.

Më pas 39-vjeçari u dërgua në spitalin e burgut në QSUT, për t’u kuruar, por edhe aty ka tentuar që të arratisej.

Ai është vrasësi i 25-vjeçarit Xhuljano Bullari, të cilin e ekzekutoi brenda makinës. Ai u gjet i vdekur mëngjesin e 21 gushtit. Bledari qëlloi të riun me tre plumba, njëri prej të cilëve i preku kokën dhe rezultoi ai më fatali që i mori dhe jetën.

Arsyeja pse Selmanaj qëlloi me shokun e burgut kishte të bënte për paratë e një sasie rreth 100 kg lëndë narkotike kanabis. Por edhe deri më sot, nuk e ka pranuar vrasjen.

Selmanaj nuk është emër i panjohur për policinë pasi ka qenë i dënuar për një sërë vjedhjesh në qytete të ndryshme.

Gjatë hetimeve të kryera policia ka zbuluar dhe një kartelë mjekësore që vërteton se Selmanaj kurohet vazhdimisht për sëmundje depresive.