Media britanike “The Sun”: Shqipëria, perla e fshehur e Evropës me histori të lashtë dhe bregdet spektakolar

Ndërsa çmimet në shumë prej destinacioneve më të njohura të Mesdheut vazhdojnë të rriten nga viti në vit, një alternativë gjithnjë e më tërheqëse për turistët është Shqipëria. Sipas medias britanike “The Sun”, vendi ofron të njëjtat ujëra të kristalta me ngjyrë bruz, peizazhe mbresëlënëse malore dhe mikpritje të ngrohtë, por me kosto shumë më të përballueshme.

Vizitorët që zgjedhin ta eksplorojnë Shqipërinë në periudhën mes verës dhe fillimit të vjeshtës mund të shijojnë plazhe më të qeta dhe perëndime të bukura dielli, larg turmave të mëdha të turistëve. Udhëtimi shpesh nis nga kryeqyteti, Tirana, ku turistët mund të marrin një makinë me qira dhe të nisin një aventurë rrugore nëpër vend.

Një nga ndalesat më të veçanta është qyteti historik i Beratit, pjesë e trashëgimisë botërore të UNESCO-s. Shtëpitë karakteristike osmane, të ndërtuara njëra mbi tjetrën në shpatin e kodrës, i japin qytetit pamjen e veçantë që i ka dhënë edhe nofkën “qyteti i një mbi një dritareve”. Brenda mureve të kalasë, vizitorët mund të përjetojnë atmosferën tradicionale të qytetit, mes rrugicave me kalldrëm dhe jetës së qetë të banorëve.

Në zonën përreth ndodhet edhe veraria familjare Alpeta, ku turistët kanë mundësi të provojnë verëra vendase dhe raki frutash, të shoqëruara me produkte tradicionale si djathë dhe vaj ulliri. Për shumë vizitorë, kjo përvojë përfaqëson një udhëtim të plotë gastronomik, nga prodhimi në fermë deri te tavolina.

Për ata që kërkojnë det dhe diell, shumë turistë drejtohen drejt Sarandës, por Vlora ofron një alternativë më të qetë dhe po aq të bukur. Nga aty mund të arrihen lehtësisht plazhet e zonës së Green Coast, të njohura për gjiret me ujëra të kthjellët dhe natyrën e paprekur.

Ndërkohë Tirana surprizon vizitorët me energjinë e saj moderne, artin urban dhe jetën e gjallë të natës, veçanërisht në zonën e Bllokut. Sipas “The Sun”, Shqipëria mbetet ende një destinacion relativisht i pazbuluar, dhe pikërisht kjo e bën atë kaq të veçantë për udhëtarët që kërkojnë përvoja autentike.