Mediat amerikane: Izraeli paralajmëroi SHBA-në për një komplot iranian ndaj Trumpit. Presidenti ndërroi avionin…

Irani dyshohet se kishte planifikuar një atentat ndaj Presidentit të SHBA-së, Donald Trump, sipas një informacioni të inteligjencës izraelite të ndarë me autoritetet amerikane, raportojnë Wall Street Journal dhe CNN, duke cituar burime të paidentifikuara.

Sipas raportimeve, Izraeli i ka përcjellë Uashingtonit një informacion të ri për një komplot konkret iranian, i ndryshëm nga kërcënimet e përgjithshme të njohura më parë ndaj Trumpit. Autoritetet amerikane kanë qenë prej kohësh në dijeni të rrezikut nga Irani, por inteligjenca e re fliste për një plan specifik.

Gjatë samitit të NATO-s në Ankara, Trump deklaroi se ishte në shënjestër të Teheranit.

“Jam në krye të çdo liste që kanë. Deri tani kam qenë me fat, por kjo mund të mos zgjasë përgjithmonë,” u shpreh ai para gazetarëve.

Raportimet lidhen edhe me vendimin e Trump për të mos u kthyer nga Turqia me avionin e ri presidencial, dhuratë nga Katari. Me rekomandimin e Shërbimit Sekret Amerikan, ai udhëtoi fillimisht me avionin më të vjetër Air Force One, ndërsa avioni i ri u dërgua veçmas në Britani, si pjesë e masave shtesë të sigurisë.

Sipas mediave amerikane, ndryshimi i avionit u bë si masë paraprake për shkak të kërcënimeve të sigurisë dhe faktit që avioni i vjetër disponon sisteme mbrojtëse të provuara, ndërsa ai i ri ende po kalon proceset e plota të përshtatjes për përdorim presidencial.

Irani ka deklaruar prej vitesh se kërkon hakmarrje për vrasjen e gjeneralit Qasem Soleimani në vitin 2020, operacion i urdhëruar nga Trump gjatë mandatit të tij të parë presidencial.