Mediat ruse: Rama rrëzoi Gruevskin, platforma shqiptare u hartua në Tiranë

Portali informativ rus Sputnik ka bërë një analizë për krizën politike në Maaqedoni dhe dështimin e Nikola Gruevskit për të formuar shumicën. Refuzimi i BDI-së së Ali Ahmetit për qeverisje me Gruevskin, shihet nga “Sputnik” si manovër e orkestruar nga Tirana zyrtare. Sipas këtij mediumi, Rama ndikoi te paritë shqiptare për rrëzimin e Gruevskit.

Në shkrim, Sputnik nënvizon se Rama ka lobuar tek ndërkombëtarët për të mbështetur kreun e opozitës së majtë Zoran Zaevin. Analistja politike Branka Gjeorgjeva, thotë për Sputnik se nëse dështon Zaevi në mundësinë për të formuar qeveri, atëherë do të mundësohej mandatimi i një shqiptari si kandidat për kryeministër.

“Dhe në fakt, e gjithë ajo që po ndodh në politikën maqedonase, i ka deri diku rrënjët në Tiranë. Sapo përfunduan zgjedhjet dhe dolën rezultatet, Rama thirri gjithë përfaqësuesit e spektrit politik shqiptar të Shkupit duke iu diktuar atyre hartimin e një platforme të përbashkët me disa pika kushtëzuese ndaj palës maqedonase. Deri më tani kjo ka funksionuar suksesshëm. Faktori shqiptar e ka futur në ngërç faktorin maqedonas, pa qenë fare nevoja për të shkrehur armët si 16 vite ma parë’ thotë analistja Gjeorgjeva për portalin rus.