VIDEO/ Gazment Bardhi poston investigimin: Balluku qeveris nga palestra, SPAK-u hesht përballë 14 akuzave

Kreu i grupit parlamentar të PD, Gazment Bardhi, ka reaguar pas një investigimi të emisionit “Fiks Fare”, duke ngritur akuza të forta ndaj ish-zv/kryeministres Belinda Balluku. Bardhi shkruan se Balluku vijon të ushtrojë ndikim mbi Ministrinë e Infrastrukturës dhe institucionet në varësi të saj, duke përcaktuar punësime, tendera dhe koncesione.

“Belinda Balluku, për shkak se ka marrë peng Edi Ramën, vazhdon të qeverisë de facto Ministrinë e Infrastrukturës dhe institucionet e saj të varësisë”, shkruan Bardhi, duke shtuar se ajo, sipas tij, “vazhdon të vendosë kush punësohet, kush fiton tendera dhe kur jepen koncesione”.

Duke iu referuar numrit të akuzave të përmendura prej tij, Bardhi ngre pyetjen se pse ndaj Ballukut nuk është vendosur masa e arrestit që ai e konsideron të përshtatshme. “SPAK-u nuk mund t’u thotë shqiptarëve se, kur ndaj Belinda Ballukut rëndojnë 6 akuza, ajo duhet të shkojë në burg, ndërsa kur rëndojnë 14 akuza, duhet të shkojë në palestër”, deklaron Bardhi.

Postimi i plotë

Dje, një investigim i emisionit “Fiks Fare” nxori sheshit atë që të gjithë e dinin. Belinda Balluku, për shkak se ka marrë peng Edi Ramën, vazhdon të qeverisë de facto Ministrinë e Infrastrukturës dhe institucionet e saj të varësisë. Ajo vazhdon të vendosë kush punësohet, kush fiton tendera dhe kur jepen koncesione.

Shefja e Ramës dhe Karakaçit, Belinda Balluku, nuk duhet të ishte duke shkuar në palestër, por pas hekurave. Për fat të keq, edhe pse SPAK-u ka 20 ditë që ka bërë publike të dhëna të reja për marrjen e saj nën hetim për korrupsion, pastrim parash dhe fshehje pasurie, ende nuk ka zbatuar ligjin për burgosjen e saj. Është e paimagjinueshme për një shtet ligjor që një person me 14 akuza penale të shëtisë lirshëm dhe madje të gjejë kohë edhe për palestër.

SPAK-u duhet të zbatojë ligjin. SPAK-u duhet të zbatojë standardin që vetë vendosi në dhjetor 2025. SPAK-u nuk mund t’u thotë shqiptarëve se, kur ndaj Belinda Ballukut rëndojnë 6 akuza, ajo duhet të shkojë në burg, ndërsa kur rëndojnë 14 akuza, duhet të shkojë në palestër. Kjo është thjesht e papranueshme!

Ligji duhet të jetë i njëjtë për të gjithë. Shqiptarët meritojnë një drejtësi që nuk njeh të paprekshëm. Opozita kërkon vetëm një gjë: zbatimin e ligjit, me të njëjtin standard për këdo, pa përjashtim. Sepse në një shtet ligjor, pushteti nuk duhet të jetë mburojë dhe askush nuk duhet të jetë mbi ligjin.