Mali i Tomorrit, një nga destinacionet më të rëndësishme shpirtërore të bektashinjve, po pret prej tre ditësh mijëra pelegrinë nga Shqipëria, vendet e rajonit dhe diaspora. Besimtarët janë ngjitur në malin e shenjtë për të nderuar Shenjtin Abaz Ali dhe për t’u lutur për paqe, shëndet, mbarësi dhe begati në familjet e tyre.
Pelegrinazhi do të vijojë deri më 25 gusht dhe përbën një nga ngjarjet më të rëndësishme të kalendarit shpirtëror bektashian. Çdo vit, kjo festë fetare e shndërron Malin e Tomorrit në një pikë të madhe pelegrinazhi, ku mblidhen qindra mijëra besimtarë dhe vizitorë.
Një pjesë e veçantë e përvojës është edhe qëndrimi në natyrë. Shumë pelegrinë zgjedhin të kalojnë të paktën një natë në çadra, në lartësitë e malit, duke e konsideruar fjetjen nën qiell të hapur si pjesë të traditës dhe përkushtimit shpirtëror.
Mes lutjeve, riteve dhe qëndrimit në natyrë, pelegrinazhi vijon të mbajë gjallë një traditë të rëndësishme të komunitetit bektashian, duke e kthyer çdo vit Malin e Tomorrit në një vend bashkimi, besimi dhe shprese.
Me rritjen e numrit të pelegrinëve çdo vit, janë marrë masa të shumta për mbarëvajtjen e aktivitetit. Baba Edmond Brahimaj, i njohur si Baba Mondi, tregon për masat e ndërmarra, kushtet e krijuara për besimtarët dhe përcjell mesazhin e tij për të gjithë ata që vizitojnë Kulmakun.
“Në 20-25 gusht në Malin e Tomorrit zhvillohet një pelegrinazh i përbotshëm dhe i përmotshëm. Kjo për nder të dëshmorit të Qerbelasë, Abaz Aliut, i cili ra dëshmor në Qerbela për demokracinë, paqen dhe mirësinë mbarënjerëzore. Dhe ne si fetarë respektojmë njeriun që është qenia më e përkyer. Këtu vijnë njerëz dhe besimtarë për të marrë mirësinë e këtij mali. Për t’ju lutur Zotit, paqes dhe dashurisë”, tha mes të tjerash Baba Mondi.