Shtetet e Bashkuara kanë ndërmarrë një operacion ushtarak të gjerë kundër objekteve bërthamore të Iranit, të cilin autoritetet amerikane e kanë cilësuar si një “sukses të plotë”.
Ministri amerikan i Mbrojtjes, Pete Hegseth, deklaroi gjatë një konference për shtyp në Pentagon se sulmet ajrore të kryera natën e kaluar kishin për synim dobësimin dhe shkatërrimin e kapaciteteve bërthamore të Iranit.
“Ambiciet bërthamore të Iranit janë neutralizuar plotësisht. Programi i tyre bërthamor është shkatërruar pa shkaktuar humbje në njerëz,” – u shpreh Hegseth.
Sipas tij, objektivi kryesor i sulmeve ishin vetëm objektet bërthamore dhe jo trupat iraniane apo civilët. Goditjet u përqendruan në instalacionet kryesore në Fordo, Natanz dhe Isfahan, ku janë përdorur raketa Tomahawk dhe bomba të specializuara për depërtim në bunkerë të nëndheshëm.
Presidenti amerikan Donald Trump, në një deklaratë të shkurtër, e përforcoi këtë mesazh duke theksuar:
“Fordo nuk ekziston më,” – ndërkohë që siguroi se nuk pati humbje jete në anën iraniane.
Në reagim të menjëhershëm, Irani lëshoi dhjetëra raketa drejt Izraelit, duke shkaktuar disa të plagosur dhe dëme materiale. Deri më tani, nuk raportohet për përfshirje të drejtpërdrejtë të trupave amerikane apo iraniane në terren.
Ky zhvillim i ri përshkallëzon ndjeshëm tensionet në Lindjen e Mesme, me analistët që paralajmërojnë për rrezikun e një konflikti më të gjerë në rajon.
Ushtria amerikane ka përdorur 14 bomba për shkatërrimin e bunkerëve, GBU-57, gjatë sulmeve të kryera kundër ndërtesave kryesore bërthamore të Iranit, tha gjenerali amerikan, Dan Caine, gjatë një konference për media në Pentagon.
Bombat e fuqishme goditën dy objekte bërthamore, tha Caine, që është shef i Shtabit të Përgjithshëm të ushtrisë amerikane.
SHBA-ja po ashtu ka përdorur dhjetëra raketa Tomahawk dhe mbi 125 avionë luftarakë në operacionin, që sipas gjeneralit Caine, u titullua “Çekani i Mesnatës”.
Ai tha se avionët amerikanë përdorën taktika që të mos detektoheshin nga autoritetet iraniane, duke shtuar se nuk ka informacione që Irani ka sulmuar ndonjë avionë amerikanë gjatë qëndrimit të tyre në hapësirën ajrore të Republikës Islamike.
Cain tha se sulmi u krye në orën 02:10 sipas kohës lokale në Iran dhe raketat Tomahawk ishin të fundit që u përdorën gjatë sulmit.
Sa i përket dëmeve të shkaktuara në tre objektet bërthamore, gjenerali Caine tha se bazuar në informacionet fillestare ato kanë pësuar dëme të mëdha dhe shkatërrim.