Ministri Demo: 2.5 milionë euro për bashkitë që ofrojnë shërbime më të mira

Bashkitë që tregojnë rezultate më të mira në ofrimin e shërbimeve publike do të kenë më shumë mbështetje financiare përmes Grantit të Performancës. Ministri i Shtetit për Pushtetin Vendor, Ervin Demo njoftoi se këtë vit fondi i Grantit të Performancës arrin në 2.5 milionë euro. Sipas tij, financimi do të përqendrohet te bashkitë që dëshmojnë rezultate konkrete në ofrimin e shërbimeve për qytetarët.

Fondi prej 2.5 milionë eurosh përbëhet nga 2 milionë euro nga buxheti i shtetit dhe 500 mijë euro kontribut nga partnerët zviceranë dhe suedezë, të cilët kanë mbështetur ndërtimin e këtij mekanizmi të financimit të lidhur me performancën e bashkive. Sipas ministrit Demo, synimi është që mbështetja financiare të orientohet drejt bashkive që arrijnë rezultate më të mira dhe ofrojnë shërbime më cilësore për qytetarët.

“Më shumë mbështetje për bashkitë që bëjnë më shumë për qytetarët! Me 2.5 milionë euro Grant Performance, po vendosim edhe më fort fokusin aty ku duhet: te shërbimet që qytetarët prekin çdo ditë, çerdhe e kopshte më të mira, më shumë shërbime sociale, qytete më të pastra dhe bashki më të përgjegjshme. 2 milionë euro nga buxheti i shtetit, të cilave u shtohen 500 mijë euro nga partnerët zviceranë dhe suedezë, që kanë mbështetur fuqimisht ndërtimin e këtij mekanizmi. Bashki më të forta. Shërbime më të mira. Më shumë për qytetarin”, u shpreh Demo.