Ministri Enea Karakaçi ndan pamjet: Shqipëria në fokus të energjisë së rinovueshme në Ministerialin e Malit të Zi

Në kuadër të procesit të Berlinit dhe përpjekjeve për integrimin në BE, ministri i Infrastrukturës dhe Energjisë, Enea Karakaçi mori pjesë në Ministerialin e Energjisë të zhvilluar në Mal të Zi, ku u diskutuan politikat dhe masat që vendet e Ballkanit po ndërmarrin në sektorin energjetik.

Gjatë fjalës së tij, Karakaçi theksoi rëndësinë e forumit si një platformë bashkëpunimi mes institucioneve financiare ndërkombëtare, ministrave të energjisë dhe aktorëve privatë të interesuar për investime në rajon.

Në takim u diskutua gjithashtu edhe sfida e re për rajonin: taksa e karbonit e vendosur nga Bashkimi Europian, e cila parashikon tarifa shtesë për prodhimin e energjisë jo të rinovueshme. Sipas Karakaçit, kjo përbën një mundësi për Shqipërinë që të forcojë më tej pozicionin e saj dhe të tërheqë investime të reja në energji të pastër. Në përfundim, ministri u shpreh se Shqipëria është e përgatitur për këto zhvillime dhe ndodhet në një pozicion konkurrues krahasuar me vendet e tjera të rajonit.

Postimi i plotë

Ishim sot në Mal të Zi, në Ministerialin e Energjisë, përsa i përket procesit të Berlinit dhe përsa i përket të gjitha masave që shtetet e rajonit të Ballkanit janë duke marrë për përafrimin në Bashkimin Europian. Ky ishte një Forum mjaft i mirë, kishte një bashkëbisedim ndërmjet institucioneve financiare ndërkombëtare, ministreve të Energjisë, por edhe të gjithë aktorëve privat që duan të investojnë në rajon. Edhe një herë u theksua mjaft qartë të gjitha politikat mbështetëse që Qeveria Shqiptare ka realizuar për energjinë e rinovueshme.

Shqipëria vazhdon të jetë kampion në energjinë e rinovueshme nëpërmjet të gjitha skemave mbështetëse të ankandeve, por jo vetëm edhe investimeve që tashmë kanë marrë jetë si në rastin e energjisë fotovoltaike, të cilat janë realizuar pa mbështetje qeveritare dhe vetëm me iniciativë proivate. Problematikë që ngritën të gjithë shtetet e Ballkanit Perëndimor është taksa e re e karbonit e implementuar nga Bashkimi Europian që nënkupton që çdo prodhim energjie elektrike jo e rinovueshme në vendet e rajonit do të taksohet shtesë nga Bashkimi Europian.

Edhe këtu, ky është një oportunitet shumë i mirë që Shqipëria duke qenë kampion i energjisë së rinovueshme në rajon, të shfrytëzojë këtë potencial dhe të rrisë investimet në energjinë e rinovueshme. Kjo politikë e Bashkimit Europian gjen Shqipërinë shumë të përgatitur dhe madje në një proces më konkurrues me të gjitha vendet e tjera.