Ministri Ermal Nufi viziton qendrën e inovacionit të sigurisë dhe mbrojtjes: Fokus te teknologjia dhe zhvillimi i kapaciteteve

Ministri i Mbrojtjes, Ermal Nufi zhvilloi sot një vizitë në Qendrën e Inovacionit të Sigurisë dhe Mbrojtjes, ku u njoh nga afër me punën e inxhinierëve dhe ekspertëve që kontribuojnë në avancimin e teknologjive moderne në funksion të sigurisë dhe mbrojtjes.

Gjatë vizitës, ministri theksoi rëndësinë e nxitjes së inovacionit dhe forcimit të kapaciteteve përmes integrimit të teknologjive bashkëkohore, duke e konsideruar këtë qendër si një hallkë të rëndësishme në zhvillimin e ekosistemit të inovacionit në vend.

“Qendra po kultivon një mjedis të qëndrueshëm që inkurajon idetë inovative, mbështet talentet e reja dhe afron start up-et drejt sektorit të sigurisë dhe mbrojtjes”, u shpreh ministri Nufi gjatë takimit me stafin teknik dhe ekspertët e qendrës. Ai vlerësoi punën profesionale të ekipit dhe përkushtimin në krijimin e zgjidhjeve teknologjike që synojnë rritjen e efikasitetit dhe modernizimin e kapaciteteve në këtë sektor strategjik.

”Në vëmendje të veçantë kemi nxitjen e inovacionit dhe avancimin e kapaciteteve përmes integrimit të teknologjive bashkëkohore që i përkasin fushës së Sigurisë dhe Mbrojtjes. Përgjatë vizitës së sotme pranë Qendrës së Inovacionit të Sigurisë dhe Mbrojtjes, u njoha më nga afër me punën e inxhinierëve dhe ekspertëve të kësaj qendre që po kultivojnë një mjedis të qëndrueshëm duke inkurajuar ide inovative, nxitur ekosistemin, afruar talente dhe start up-et”,-shkruan Nufi.