Ministri Gjiknuri shkon në këmbë në Top Channel. Banorët protestë para tij

Ministri Gjiknuri u ndje para një situate të papritur kur po shkonte në Top Channel.

Pronarët e banesave që preken nga ndërtimi i Unazës së Re, të cilët prej ditësh protestojnë duke bllokuar rrugën, e zhvendosën protestën e tyre mbrëmjen e sotme përballë ambienteve të Top Channel, ku është i ftuar në emisionin “Open”, ministri i Infrastrukturës dhe Energjisë, Damian Gjiknuri.

Banorët, me pankarta në duar, kërkojnë dëmshpërblim. Banorët kërkuan takim me kryebashkiakun Erion Veliaj dhe dëmshpërblim 100% për banesat, duke kundërshtuar prishjen e objekteve para legalizimit.

“Shtëpitë tona do i mbrojmë me gjak”, paralajmëruan banorët, duke thënë se nuk do i ndalin protestat. Dhe premtimin e tyre e kanë mbajtur pasi në mbrëmje rreth orës 20:40 janë grumbulluar para derës kryesore të Top Channel për të pritur me thirrjet “Turp”, “Turp”, Turp”, ministrin e Energjisë dhe Infrastrukturës, Damian Gjiknuri. Ministri nuk ka pranuar të shoqërohej me polici.

Ministri Gjiknuri është i ftuar në emisionin “Open” të gazetares Eni Vasili dhe eskorta e tij është përballur me dhjetëra protestues që thërrisnin: “Duam shtëpitë tona”; “Mos i prekni shtëpitë tona”. Me pas mësohet se ministri nuk ka preferuar makinën, por ka lëvizur në këmbë, ku ka takuar disa protestues. Informacionet tregojnë ministri nuk ka preferuar ardhjen e forcave të policisë për ti larguar që ti hapnin rrugën.

Kujtojmë se për ndërtimin e aksit nga Pallati me Shigjeta deri tek Sheshi Shqiponja, ARRSH ka planifikuar shembjen e mbi 300 banesave dhe bizneseve.