Ministri Gonxhja: Dea e Butrintit kthehet në shtëpi, pas një rrugëtimi nga qyteti antik drejt Romës në Tiranë

Ministri i Turizmit, Kulturës dhe Sportit, Blendi Gonxhja, ka njoftuar rikthimin e statujës së njohur si “Dea e Butrintit” në vendin ku u zbulua.

Përmes një postimi në rrjetet sociale, Gonxhja shprehet se vepra e çmuar e trashëgimisë arkeologjike rikthehet në vendin ku u zbulua, pas një rrugëtimi nga Butrinti drejt Romës dhe më pas në Muzeun Historik Kombëtar në Tiranë.

“Dea e Butrintit kthehet në shtëpi!”, shkruan ministri në rrjetet sociale. Sipas Gonxhjas, rikthimi i Deas pasuron rrëfimin historik të Butrintit dhe u jep mundësi vizitorëve të shohin nga afër një prej dëshmive të rëndësishme të historisë, artit dhe trashëgimisë europiane.

Postimi i plotë

Pas një rrugëtimi nga qyteti antik drejt Romës dhe më pas në Muzeun Historik Kombëtar në Tiranë, një prej veprave më të çmuara të trashëgimisë sonë arkeologjike rikthehet në vendin ku u zbulua.

Rikthimi i Deas pasuron rrëfimin e Butrintit dhe u mundëson vizitorëve të shohin nga afër një dëshmi të jashtëzakonshme të historisë, artit dhe trashëgimisë sonë të përbashkët europiane.

Me mbi 200 mijë vizitorë këtë 8-mujor, Butrinti po forcon rolin e tij si një prej destinacioneve kryesore të turizmit kulturor në Shqipëri, një vend ku trashëgimia nuk mbetet vetëm dëshmi e së shkuarës, por krijon dije, mundësi dhe zhvillim për të ardhmen.

Falenderoj gjithë ekipin që punoi për këtë rimuzeim të Deas në Butrint, pa harruar të shpreh mirënjohjen tonë të thellë për AADF, duke garantuar mbështetjen tonë për modele suksesi si ky që kemi tashmë të prekshëm përmes Fondacionit për Menaxhimin e Butrintit.