Ministri grek ”çan” rrethimin e protestuesve dhe takon Cakajn. MJP: Bashkëpunim i thelluar

Ministri i Jashtëm i Greqisë, Nikos Dendias i cili para disa orësh mbërriti në Tiranë, ka zhvilluar një takim me Ministrin e Jashtëm në detyrë, Gent Cakaj. Fotoja e takimit u publikua nga Ministria e Jashtme e Shqipërisë, ndërsa duket se të dy ata janë përshëndetur me bërryl.

Në një reagim për takimin e zhvilluar, Cakaj u shpreh se me homologun grek, vlerësuan bashkëpunimin mes dy vendeve dhe theksuan rëndësinë e zgjidhjes së të gjitha çështjeve dypalëshe. Në takim u theksua mbështetja e Greqisë për mbajtjen e Konferencës së Parë Ndërqeveritare të Shqipërisë me Bashkimin Evropian, duke marrë parasysh arritjet domethënëse të Shqipërisë në procesin e integrimit evropian.

Për më tepër, sikurse bëri me dije Kryediplomati Cakaj në postim, Greqia do të mbështesë kandidaturën e Shqipërisë si anëtare jo e përherëshme e Këshillit të Sigurimit 2022-2023. Të dy ministrat shprehën gatishmërinë për të shtuar ritmin e punës së përbashkët e për të thelluar bashkëpunimin në çdo fushë të interesit të ndërsjellë mes dy vendeve.