Ministri Hasani në Forumin e Dubrovnikut: Ballkani Perëndimor nuk është dhomë pritjeje

Ministri për Evropën dhe Punët e Jashtme të Shqipërisë, Igli Hasani, ka marrë pjesë në Forumin e Dubrovnikut 2025, nga ku përcolli një mesazh të qartë dhe të vendosur: “Ballkani Perëndimor nuk mund të trajtohet më si periferia e kontinentit, ai është pjesë thelbësore e së ardhmes strategjike të Evropës”.

Këto fjalë ministri Hasani i tha në prani të përfaqësuesve të lartë nga rajoni, Evropa dhe më gjerë (përfshirë SHBA-në, Gjirin, Brazilin dhe Afrikën), të cilët kanë mbërritur në Dubrovnik për të marrë pjesë në forumin që u mbajt ditën e djeshme dhe vazhdon ende sot më 12 korrik.

Ministri Hasani gjatë fjalës së tij theksoi se në kohë pasigurie dhe rivalitetesh gjeopolitike, besimi, transparenca dhe transformimi nuk janë zgjedhje, por janë domosdoshmëri.

“Shqipëria nuk është një konsumatore e sigurisë, është kontribuuese. Nuk presim, po ecim përpara.”-deklaroi ai.

Mes të tjerash, ministri i jashtëm kujtoi se Shqipëria ka hapur katër grupkapituj negociues tashmë dhe shtoi se rruga drejt BE-së është strategjike, e pakthyeshme dhe e mbështetur në reforma të qëndrueshme.

Ai paralajmëroi se vonesat në procesin e zgjerimit krijojnë boshllëqe që shfrytëzohen nga aktorë autoritarë, duke mirëpritur Planin e Rritjes për Ballkanin Perëndimor si një mundësi konkrete për të përshpejtuar integrimin. Sipas tij, Evropa nuk do të jetë e plotë pa Ballkanin Perëndimor. Dhe Ballkani Perëndimor nga ana tjetër, gjithashtu nuk do të jetë i plotë pa Shqipërinë.