Ministri Hoxha pret diplomaten çeke: Rikonfirmuam angazhimin për zgjerimin e BE në Ballkanin Perëndimor

Ministri për Evropën dhe Punët e Jashtme, Ferit Hoxha priti sot në takim të Dërguarën e Posaçme të Republikës Çeke për Ballkanin Perëndimor, Edita Hrda. Hoxha gjatë takimit tha se Shqipëria dhe Çekia rikonfirmuan angazhimin e përbashkët për zgjerimin e Bashkimit Evropian në Ballkanin Perëndimor.

”Shkëmbim i shkëlqyer mendimesh me ambasadoren Edita Hrdá, mike dhe ish-kolege në OKB/New York dhe në Bruksel, aktualisht e Dërguara e Posaçme e Republikës Çeke për Balkanin Perëndimor”, shkroi Hoxha në lidhje me takimin.

Ministri nënvizoi se Shqipëria mbetet e palëkundur në rrugën e saj drejt anëtarësimit, me përparim të prekshëm dhe një ritëm të fortë reformash. ”Vlerësojmë mbështetjen e vazhdueshme të Republikës Çeke për një proces zgjerimi të besueshëm dhe të bazuar në meritë, si dhe për mbajtjen e Ballkanit Perëndimor në fokus të agjendës së Bashkimit Europian”, shkruan Hoxha.