Qeveria shqiptare ka miratuar marrëveshjen me qeverinë gjermane, në vlerën 110 milionë euro, për financimin e tre projekteve të rëndësishme në sektorin energjetik. Nga fondi total, 20 milionë euro do të jenë në formën e grantit. Ministri i Infrastrukturës dhe Energjisë, Enea Karakaçi, bëri të ditur pas mbledhjes së qeverisë se një nga projektet parashikon vijimin e rehabilitimit të konvikteve universitare, me fokus rritjen e eficiencës energjetike.
Pas investimeve të përfunduara me sukses në 15 konvikte, marrëveshja e re mundëson ndërhyrje në 14 konvikte të tjera. Investimet synojnë përmirësimin e kushteve të akomodimit, uljen e konsumit të energjisë dhe rritjen e eficiencës energjetike. Një tjetër komponent i marrëveshjes lidhet me investimet në HEC-in e Vaut të Dejës, një prej objekteve kryesore të prodhimit të energjisë elektrike në vend, i cili është ndërtuar rreth pesë dekada më parë.
Sipas ministrit Karakaçi, HEC-i i Vaut të Dejës siguron rreth 28% të prodhimit total të energjisë elektrike të KESH-it. Investimi i parashikuar synon modernizimin e impiantit dhe zgjatjen e jetëgjatësisë së tij operative me rreth 30 vite. Projekti i tretë fokusohet në digjitalizimin e operimit të sistemit të transmetimit të energjisë. Në këtë kuadër, rreth 40 nënstacione do të përfshihen në procesin e digjitalizimit, duke mundësuar menaxhim më efikas të flukseve të energjisë dhe rritjen e kapaciteteve të furnizimit.
Marrëveshja mes Shqipërisë dhe Gjermanisë përbën një mbështetje të rëndësishme për modernizimin e sektorit energjetik, duke synuar rritjen e eficiencës, përmirësimin e infrastrukturës së prodhimit dhe transmetimit, si dhe forcimin e sigurisë energjetike të vendit.