Ministri i Infrastrukturës dhe Energjisë, Enea Karakaçi, inspektoi sot punimet në aksin rrugor Elbasan-Papër, projekt i rëndësishëm për përmirësimin e infrastrukturës dhe qarkullimit në zonë. Gjatë inspektimit, Karakaçi bëri të ditur se punimet në lotin e parë po ecin me ritme të kënaqshme, ndërsa progresi fizik ka arritur në rreth 87%. Ky segment është pjesë e Korridorit VIII, një nga projektet strategjike për lidhjen rajonale dhe integrimin në rrjetin paneuropian të transportit. Gjithashtu pak javë më parë nga ana e NATO-s, ky korridor është shpallur si korridor sigurie për sa i përket kalimit të forcave transatlantike.
I gjithë aksi do të jetë i kategorisë A, me dy korsi nga 3.75 metra secila dhe korsi emergjence. Projekti parashikon gjithashtu ndërtimin e 6 nënkalimeve, si dhe realizimin e veprave të mbrojtjes lumore përgjatë segmentit. Ministri theksoi se bajpasi i Elbasanit, i cili lidhet drejtpërdrejt me këtë aks, është parashikuar në buxhetin e vitit 2026 dhe shumë shpejt pritet të nisë procedura e prokurimit. Ky element konsiderohet kyç për funksionalitetin e plotë të rrugës.
Segmenti me gjatësi 9.9 kilometra është i ndarë në tre faza dhe nis pranë ish-Kombinatit Metalurgjik, lidhet me bajpasin e Elbasanit dhe përfundon pranë kryqëzimit të Cërrikut, në afërsi të fshatit Valas. Aktualisht, hapja e trasesë ka përfunduar në të tre fazat, ndërsa po vijon vendosja e trarëve në urat e segmentit. Punimet për mbrojtjen lumore janë drejt përfundimit, paralelisht me ndërtimin e veprave të vogla të artit dhe shtresave rrugore. Në muajt në vijim pritet të nisë edhe shtrimi i asfaltit. Ky aks i cili shtrihet përgjatë luginës së lumit Shkumbin, pritet të përmirësojë ndjeshëm qarkullimin dhe të lehtësojë lidhjen mes zonave përreth, duke rritur sigurinë dhe efikasitetin e transportit në një nga korridoret më të rëndësishme të vendit.
