Ministri Lamallari: Ambientet e reja të Policisë në Berat, investim për shërbim më cilësor dhe siguri më të lartë

Ministri i Brendshëm, Besfort Lamallari, së bashku me Drejtorin e Përgjithshëm të Policisë së Shtetit, inspektoi këtë të enjte ambientet e reja të Drejtorisë Vendore të Policisë Berat, duke e cilësuar investimin si një hap të rëndësishëm në modernizimin e Policisë së Shtetit dhe përmirësimin e shërbimeve ndaj qytetarëve.

Postimi i plotë

Bashkë me Drejtorin e Përgjitshëm të Policisë së Shtetit ishim sot në ambientet e reja të Drejtorisë Vendore të Policisë Berat, një investim që përkthehet në kushte më të mira pune për efektivët, hapësira dinjitoze për pritjen e qytetarëve, ambiente të posaçme për të miturit, avokatët dhe mjekët, si edhe një sallë operative të standardeve bashkëkohore, për një reagim më të shpejtë dhe më efikas ndaj çdo kërkese apo emergjence.

Krahas mbështetjes në rritje për trajtim më të mirë financiar dhe investimeve në teknologji, qeveria shqiptare vijon mbështetjen për Policinë e Shtetit, e cila po modernizohet edhe me infrastrukturë që i përgjigjet standardeve europiane.

Berati është një nga kartolinat më të bukura të Shqipërisë dhe çdo turist që zgjedh ta vizitojë duhet të ndiejë të njëjtën siguri dhe besim si qytetarët tanë. Një polici moderne nuk garanton vetëm rendin publik, por është edhe fytyra e shtetit për qindra mijëra vizitorë të huaj që vijnë çdo vit në këtë qytet.