Ministri Salla: Rehabilitohet kanali vaditës në Kurbin, ujitje për rreth 700 ha tokë bujqësore

Në bashkinë e Kurbinit kanë përfunduar punimet për rehabilitimin e kanalit ujitës KU-15, investim i rëndësishëm për zhvillimin e bujqësisë në zonë.

Ministri i Bujqësisë dhe Zhvillimit Rural, Andis Salla, ministri i Mbrojtjes, Ermal Nufi, deputeti i PS-së, Ermal Pacaj dhe kryetarja e bashkisë Kurbin, Majlinda Cara, inspektuan nga afër përfundimin e punimeve.

“Me një gjatësi prej 11 km, ky kanal është rehabilituar plotësisht përmes pastrimit të seksionit, punimeve në beton dhe riparimit të veprave të artit, duke rikthyer funksionalitetin e plotë të sistemit të ujitjes”, tha ministri Salla në një postim në rrjetet sociale.

Ministri Salla u shpreh se “falë këtij rehabilitimi, përfitojnë ujitjen e garantuar rreth 700 hektarë tokë bujqësore, duke mbështetur fermerët dhe rritur qëndrueshmërinë e prodhimit bujqësor në zonë”.