Ministria e Jashtme: Aktivisti Baki Goxhaj është transferuar në Izrael! Ambasada po punon për ta kthyer në atdhe

Ministria për Europën dhe Punët e Jashtme ka njoftuar se Baki Goxhaj, aktivisti shqiptar i ndaluar në flotiljen Sumud (që po dërgonte ndihma në Gaza), ndodhet në shtetin izraelit. Ministria thotë se Ambasada shqiptare në Tel Aviv do të mundësojë një takim me Goxhajn, për të mundësuar kthimin sa më të shpejtë të tij në Shqipëri.

”Ministria për Evropën dhe Punët e Jashtme vazhdon të ndjekë më vëmendje e përparësi situatën lidhur me shtetasin shqiptar, z. Baki Goxhaj, pjesëmarrës në flotiljen “Sumud”, i ndaluar nga autoritetet izraelite së bashku me të gjithë pjesëmarrësit e tjerë.

Sipas informacioneve zyrtare, ai është transferuar në Izrael. Ambasada e Republikës së Shqipërisë në Tel Aviv është në kontakt të vazhdueshëm me autoritetet izraelite dhe së shpejti do të zhvillojë takim me z. Goxhaj, për t’i ofruar asistencën e nevojshme konsullore dhe në këtë kuadër, për të mundësuar kthimin sa më të shpejtë dhe të sigurt të shtetasit shqiptar në atdhe”,-thuhet në reagimin e Ministrisë për ”Report Tv”.