Ministrja e Shëndetësisë: Për herë të parë në Shqipëri ngrihet Instituti i Tumoreve

Ministrja e Shëndetësisë dhe Mirëqenies Sociale, Evis Sala deklaroi ditën e sotme, se në mbledhjen e Qeverisë u miratua vendimi për ngritjen e Institutit të parë të Tumoreve në Shqipëri, një strukturë e konceptuar sipas modeleve evropiane.

Në daljen publike, pas mbledhjes së Qeverisë, Sala bëri të ditur se ky është një vendim historik dhe sfidë personale për të.

“Shqipëria do të ketë për herë të parë një Institut të Tumoreve, të organizuar sipas modeleve më të mira evropiane. Modeli mbi të cilin është mbështetur ngritja e tij është ai i Milanos.

Në fushën klinike, instituti do të ofrojë shërbime të kirurgjisë onkologjike, kimioterapisë dhe radioterapisë. Në fushën e mësimdhënies, ai do të angazhohet në formimin dhe edukimin e specialistëve të onkologjisë, ndërsa në fushën e kërkimit do të krijohet një njësi e studimeve klinike.

Kjo është me rëndësi të veçantë, pasi do t’u mundësojë pacientëve shqiptarë të bëhen pjesë e studimeve klinike ndërkombëtare, duke u dhënë akses në barna inovative dhe trajtime të reja.

Aktualisht në vend funksionojnë tetë pika kimioterapie. Me hapjen e pikës së re në Spitalin Rajonal të Fierit, ky numër do të rritet në nëntë. Instituti do të shërbejë si qendra kombëtare e koordinimit të rrjetit të pikave të kimioterapisë në të gjithë vendin.

Vendimi i miratuar nga Qeveria i hap rrugë krijimit ligjor të Institutit të Tumoreve, ndërsa tashmë nis puna për ngritjen e strukturës dhe përcaktimin e mënyrës së funksionimit të tij.

Vendimi i miratuar sot krijon bazën ligjore për themelimin e institutit. Tashmë do të nisë puna për ndërtimin e strukturës organizative dhe vënien në funksion të tij”, deklaroi Sala.

Ministrja e Shëndetësisë dhe Mirëqenies Sociale bëri të ditur se Instituti i Tumoreve do të funksionojë pranë Shërbimit të Onkologjisë në Qendrën Spitalore Universitare “Nënë Tereza”.

Në përgjigje të interesit të gazetarëve, lidhur me koston që do të ketë ngritja e këtij instituti, Sala sqaroi se ai do të financohet përmes buxhetit të alokuar për funksionimin e tij, ndërsa për komponentin e kërkimit shkencor do të ketë edhe një fond shtesë nga buxheti i shtetit.

“Instituti do të qëndrojë aty ku është fizikisht shërbimi i Onkologjisë. Ne kemi plane për ta rikonstruktuar, për ta zgjeruar dhe do t’ju informojmë. Si institut shkencor, kjo do të jetë hera e parë, ndaj do të ketë edhe një pjesë buxheti shtesë nga buxheti i shtetit për pjesën kërkimore-shkencore”, deklaroi ajo.