“Mirë se erdhe në shtëpi”, Biden pret Trump dhe bëhet betimi në Kongres

Presidenti ende në detyrë Joe Biden dhe gruaja e tij Jill mirëpritën Donald Trump dhe Melania në Shtëpinë e Bardhë. Ata u ulën për çaj, dhe më pas u nisën për në Kapitol. Ceremonia që tradicionalisht mbahet jashtë ndërtesës së Kapitolit të SHBA-së, është zhvendosur brenda për shkak të parashikimit të temperaturave të ulëta me erëra që ndihen si -13°C (9°F). Pas betimit, Trump do t’i drejtohet kombit. Më vonë, pritet të marrë pjesë në tre ballo inaugurimi gjatë mbrëmjes. Trump pritet të betohet në Capitol Rotunda nga shefi i drejtësisë John Roberts.

Biden pranoi se ka lënë një letër në Zyrën Ovale për paraardhësin dhe pasardhësin e tij, presidentin e zgjedhur Donald Trump. I pyetur nga gazetarët jashtë Shtëpisë së Bardhë nëse kishte shkruar një letër, Biden tha: “Po” megjithatë ai refuzoi të japë më shumë detaje. ”Kjo është mes Trump-it dhe meje”,-tha ai, sipas raportimeve të gazetarëve. Trump kishte lënë një letër në vitin 2021, të cilën Biden më vonë e përshkroi si “shumë bujare”.

Ish presidentët amerikanë Bill Clinton ( së bashku me bashkëshorten Hillary), George Bush (së bashku me bashkëshorten Laura) dhe Barack Obama, kanë mbërritur në Kapitol për inaugurimin presidencial të Donald Trump. Siç e kishte paralajmaruar, Michele Obama nuk ka marrë pjesë në betimin e presidentit republikan.

Bibla me të cilën do të betohet Trump

Donald Trump do të betohet në të njëjtën Bibël që u betua Abraham Lincoln në vitin 1861. Megjithatë, Trump do të ketë edhe Biblën e tij. Të njëjtën gjë e ka bërë edhe në inaugurimin e vitit 2017.