Mjekja shqiptare në Itali, letër Ramës: Dita e re sot na gjeti ne shqiptarëve, krenarë

Mjekja shqiptare Kozeta Proko, e cila punon dhe jeton në Itali, në një letër dërguar kryeministrit Edi Rama, shkruan se ditën e sotme, shqiptarët që jetojnë në Itali, i gjeti më krenarë se kurrë.

Proko nënvizon faktin se dërgimi i ekipit mjkeësor prej 30 vetësh dje në ndihmë të Italisë, tregoi virtytin më të mirë të shqiptarëve, ndihmën mikut në ditë të vështirë.

Letra e plotë:

I Nderuar Kryeminister Rama,

Askujt nuk i shkonte ndërmend që Shqipëria, vendi i vogël përtej Adriatikut, i goditur vetëm pak muaj më parë nga tragjedia e tërmetit shkatërrimtar, të mund të gjente forcën e resurset e të dërgonte një ekip mjekësor prej 30 vetësh, për t’i qëndruar pranë mikes së vjetër e të shtrenjtë të të gjithë shqiptarëve, Italisë.

Dita e re, këtu në provincën e Trevizos, të gjithë shqiptarëve, ne veçanti ne mjekëve shqiptarë qe jetojmë e punojmë në Itali, na gjeti krenar!

Këta kolegë, me punën e tyre në shërbim të mbrojtjes së jetës, janë dëshmi e një prej cilësive më fisnike të popullit shqiptar…ndihmesën e mikut në ditë të vështira.

Në çastet më të errëta të dallgëve të historisë, ne shqipëtarët kemi treguar virtytet tona më të mira.

Jemi duke jetuar ditë të vështira, në një betejë që kërkon sakrificë prej secilit prej nesh.

Nëse këta kolegë kanë lënë pas familjet e shtëpitë e tyre, në emër të betimit të shenjtë në mbrojtje të jetës, ju lutem të gjithë ju të tjerëve të qëndroni në shtëpi!

Të kemi të gjithë besim tek masat mbrojtëse të menjëhershme që institucionet e Shqipërise ditën të ndërmerrnin, të cilat i përgëzoj.

Për të mirën tonë, të familjarëve e të afërmve tanë, në respekt të sakrificës e punës së gjithë mjekëve, që fitorja e kësaj beteje të jetë sa më e afërt…QËNDRONI NË SHTËPI!!

Dr.ssa Kozeta Proko

Responsabile settore Ematologia e Autoimmunita’

Laboratorio Analisi di Castelfranco Veneto e Montebelluna

Distretto Asolo – ULSS n.2 della Marca Trevigiana