Mocioni në PS nga Spiropali, analisti Nano: Efekt i protestës, t’u bjerë gjërave në kokë

Analisti Mustafa Nano komenton mocionin e dorëzuar nga Elisa Spiropali në Asamblenë e PS-së. Nano tha se përpjekja e Spiropalit në këtë moment ka rëndësinë e vet. Megjithatë, duke hequr një paralele mes saj dhe Jorida Tabakut, Nano tha se të dyja kanë kontribuar në kalçifikimin e njëshit në parti. ”Midis dëshirës për ta përgëzuar këtë hapi interesant në këtë mjedis politik të ngrirë dhe sanduiçit është një lloj marazi pse ky personazh, Elisa Spiropali, që sot po del me këtë status, me këtë pamje, para disa kohësh ka dhënë kontributin e vet për të kalçifikuar pozitën e njëshit në parti. Të njëjtin pozicion sanduiç e kanë politikanë të sojit të Spiropalit. Nga ana tjetër është Jorida Tabaku. E pëlqej si personazh, por nuk i fal një gatishmëri për t’u konfirmuar deri në ekstrem”,-tha analisti.

Nano tha se kjo lëvizje është meritë e protestës. ”Në këtë moment i jap më shumë rëndësi kësaj që Spiropali do të bëjë. Nuk di nëse këtë lloj mocioni do ta paraqiste nëse protesta nuk do të ishte? Nuk besoj. Ja që protesta e paska një lloj kontributi, që ne këtu edhe mund t’ia kemi mohuar. Kontributet e protestës janë edhe të padukshme, vetëm kur na dalin si puna e Spiropalit.

Spiropali duhet t’u bjerë gjërave në kokë. Por nuk e kërkon këtë. Këta njerëz duhet ta demonstrojnë që kanë një vizion të ri. Ka shumë gjëra që kanë qenë karakteristika të klasës së vjetër politike dhe duhen kritikuar. Ndërtesat më të bukura në Tiranë i kanë partitë. Duhej t’i kishin institucionet. Ky është kulti i partisë. Një lëvizje e re duhet të fillojë me këtë. Ndërtesat më të bukura duhet ti kishin institucionet e shtetit. Këta dalin me teza që mezi lexohen.

Spiropali dhe Tabaku janë pak a shumë njësoj. Dy zonja të fisme në terma të sjelljes publike. Do të donin shumë të ishin në krye. E dinë që mjedisi është maçoist. Përpiqen të manovrojnë me mënyrën e feminizuar të të bërit politik. Kanë arritur diçka por është edhe falë kryetarëve. Tabaku u zgjodh në sajë të këllqeve të veta. Nuk bën asnjë përpjekje për t’i dhënë vlerë kësaj situate që është defakto”,-tha më tej Nano në ”MCN TV”.