Momente ankthi në plazhin e Velipojës, humbin dy fëmijë, reagimi i policisë bashkiake çoi në gjetën e shpejt të tyre

Dy episode që krijuan ankth dhe shqetësim u regjistruan këtë të diel në plazhin e Velipojës, një prej destinacioneve më të frekuentuara të bregdetit shqiptar gjatë sezonit veror. Dy fëmijë u raportuan të humbur në dy raste të ndara, mes fluksit të madh të pushuesve që kishin mbushur vijën bregdetare.

Menjëherë pas marrjes së njoftimit, Policia Bashkiake organizoi kërkimet në terren, duke koordinuar veprimet me personelin e shërbimit në plazh. Falë reagimit të shpejtë dhe ndërhyrjes së menjëhershme, të dy fëmijët u lokalizuan brenda pak minutash dhe iu dorëzuan shëndoshë e mirë familjarëve të tyre, duke i dhënë fund momenteve të tensionit dhe panikut.

Ngjarja shërben si një kujtesë e rëndësishme për rreziqet që mund të lindin në plazhet e mbipopulluara gjatë sezonit turistik. Mjaftojnë vetëm pak çaste shpërqendrimi që një fëmijë të largohet nga prindërit ose të humbasë orientimin mes turmës.

Autoritetet u bëjnë thirrje të gjithë prindërve dhe kujdestarëve të tregojnë kujdes maksimal, të mbajnë fëmijët vazhdimisht nën mbikëqyrje dhe, kur është e mundur, t’u mësojnë atyre një pikë takimi apo t’i pajisin me një mjet identifikimi me numrin e kontaktit të familjarëve.

Reagimi i shpejtë i strukturave përgjegjëse bëri që kjo ngjarje të përfundonte pa pasoja, por mbetet një apel i fortë për vigjilencë, pasi siguria e fëmijëve në hapësirat publike është një përgjegjësi që kërkon vëmendje të pandërprerë.

AV / KJ