Moti i ftohtë, Avokati i Popullit kërkon ngritjen e vendstrehimeve për të pastrehët

Avokati i Popullit, Igli Totozani ripërsëriti thirrjen për drejtuesit vendor që të përgatisin vendstrehime për të pastrehët dhe grupet në nevojë emergjente, në këtë mot të ashpër me temperatura ekstreme.

Avokati i Popullit, Igli Totozani përshëndet qëndrimin e Ministrisë së Shëndetësisë, që paralajmëron popullsinë për temperatura ekstreme në vendin tonë në ditët në vijim. Në nisje të stinës së ftohtë të dimrit, Avokati i Popullit i dërgoi një rekomandim të gjithë Kryetarëve të Bashkive për marrjen e masave organizative për përgatitjen e vend-strehimeve apo vend-qëndrimeve provizore për grupe në nevojë emergjente, që kërkojnë ndihmë nga organet e pushtetit vendor, me qëllim parandalimin e situatave që mund të rrezikojnë jetën apo shëndetin e tyre.

Në kushtet e një moti të ashpër me temperatura ekstreme, Avokati i Popullit Igli Totozani, u ripërsërit thirrjen drejtuesve të pushtetit vendor për të marrë masa urgjente për të pastrehët dhe njerëzit në nevojë.

Ky apel i drejtohet të gjithë strukturave të tjera shtetërore, si edhe përfaqësuesve të shoqërisë civile, që të tregojnë solidaritet për të vetmuarit, të pamundurit dhe çdo njeri që ka nevojë për ndihmë.